Bienvenida Argentina

03.08.2008
Adios arroz y muchas vacas

Noch 1 1/2 h sueche haend mir denn doch no en 8ter Schlag gfunde, wo mir tod mued is Bett gheit sind. Mittlerwiile sind mir z'achte underwegs -> 2 Jungs (Franzose) haend sich no zu uesere Gruppe gsellt was Reise nid eifacher gmacht haet. Am noechste Morge haend mir ues inere andere Welt wieder gfunde. Unglaublich de Wechsel noch nur eim Grenzuebertritt. Fascht wie in Europa haets eifach alles gha. Mir haend es paar Stunde brucht, bis mir de Wechsel vom aermste zu eim vo de riichste Laender in Suedamerika verdaut haend. Natuerlich haend mir die feini Kafi's, Fleisch & Wy wie au mol wieder chli shoppe gnosse. So haets also ab jetzt a jedem Obig e feins Stuck Fleisch und eis, zwei Glaeser Wy geh und wenn ich (Chrigel) ganz brav gsi bi haets au no en Dessert doerfe sii.

Noch 3 Taeg Salta haend mir ues denn am Mentig vo de Anne, Jean-Pascal, Flavien und Reno verabschiedet und mir sind nu no z'vierte witer uf die 24h Busfahrt uf Puerto Iguazu. D' Busfahrt isch besser verlaufe als mir denkt hend und so sind mir guet in Puerto Iguazu acho.

Viel het au das Tourisdoerfli noed z' buete und so sind mir noch Hostelbezug e chli im Kaff umegschlendered und haend ues uf de noechsti Tag gfreut. Natuerlich haets au do Fleisch & Wy zum z'Nacht geh. Am 07.10 h simmer uf de Bus und haend mit de erschte Touris d'Faell gstuermt. Leider haets Wetter nid so mitgspielt, und so haend mir noch knapp 3 Moened wieder chli Rege gha. Trotzdem haend mir de grandios Usblick uf die Faell - fast so idruecklich wie de Rhyfall - gnosse und haend au immer wieder es Aug uf Brasilie gworfe. Kei Angst, uesi Plaen goend nid i die Richtig. Do zur Ziit au in Buenos Aires und wohl ueberall uf de Welt Ferie sind, hets nur so gwimlet vo Touris und es isch ues zum Teil fascht z' viel worde. Do de Rege immer staercher worde isch, hend mir de Usflug id Selva (Urwald) si loh und sind zrug uf Puerto Iguazu.

Schliesslich hend mir ues wieder uf s'Fleisch muesse vorbereite und s'isch uesen letschte Obig mit de Sonja und em Oliver gsi, die Zwei wo mir uf em Pichincha troffe hend. Jetzt gohts wieder allei witer. S' isch e total laessigi Ziit mit de French-Conection gsi, aber me isch hald scho extrem bunde und cha noed mache wie mer woet. Eimol meh stoend 22h busfahre uf em Programm bis noch Cordoba, die zweit groesst Stadt vo Argentinie. Im Aschluss gohts denn witer uf Mendoza, wo mir ues no chli intensiver mit em argentinische Wy usenandsetzed.

HASTA VINO!!!

09.08.2008
Vino tinto - hicks - olé!

In Cordoba sind mir nu ei Nacht blibe und haend am noechste Tag es typisch's "argentinisch's Dorf" ahglueged. Villa Gral. Belgrano, es Dorf wo vo Duetsche gruendet worde isch und das wird jetzt touristisch total usgschlachtet. Isch aber trotzdem laessig gsi, en Oepfelstreusel und -strudel zu heimatliche Klaeng z'esse. Wo mir denn ueses alltaegliche Fleisch haend wellae gnuesse haends ues uf die 21.00 h vertroested, wa fuer ues z'spot gsi isch, drum haets denn D-Wuerst und Chruut und Haerdoepfel geh. De Tag haet ues doch es einte oder andere Mol zum schmunzle brocht. Denn isch'es endlich wieder Ziit fuer e Busfahrt gsi - Yes!

Mittlerwiile als Bus-Junkies underwegs versueched mir immer wieder e Moeglichkeit z'finde, zum 20 h - Marke z'uebertreffe. Leider haets uf Mendoza nur 10 h geh... Haend ues sehr uf die Region - es Wymekka vo Argentinie; 90 % vo de Wyproduktion - gfreut. Zuedem haend mir det au nomol d'Anne und de Jean-Pascal troffe und haend mit ihne am kommende Tag mit de Bikes d'Bodegas vo Maipù bsuecht - hicks. Am Obig haets denn leider scho wieder gheisse Abschied neh, und sie sind wiiterzoge noch Cordoba.

Uesi Ziil haend Cafayate und Salta gheisse. Wieder en Nachtbus (14h) und grad im Ahschluss no en Fuefstuender uf Cafayate, da haet ueses Herz doch wieder hoecher Schloh loh. In Cafayate haend mir per Zuefall e super netti Underkunft gfunde, und haend so de Priis fuer d'Uebernachtig choenne halbiere. Juhui, meh cha d'Quebrada de Cafayate aellei und mit em Bike mache, allerdings sind 48 km uf em Programm gstande. So haend mir ues mega uf de Dunnstig gfreut. Es isch en super schoene Tag gsi, allerdings haet d'Reifepanne de Chrigel churz us de Fassig brocht -> Chrigel is not amused Teil 1. Trotzdem isch de Wechsel in Rekordziit ueber d'Buehni, de Hansueli Russeberger (uesen Velohaendler) het e wari freud gha und wiiter isch es gange. Die 48 km sind ahstrengender gsi als mir denkt haend, und so sind mir erscht noch 6 h wieder zrugg in Cafayate gsi. Mit Empanadas, Glace und am Obig eme Glaesli Wysse und enere Flaesche Rote haend mir de Tag entsprechend abgschlosse.

Eigentlich haend mir no ein Tag meh wellae in Cafayate bliibe, leider isch es aber nid moeglich gsi zum die noche Ruine mit de OEV z'bsueche bzw. waer en grosse Ufwand gsi. So haend mir entschlosse wiiter z'zieh und uf Salta zrugg z'go, uesem Usgangsort vo Argentinie und uesere Meinig no die Stadt mit em meischte Charakter und Charme vo Argentinie. Do gnuessed mir nomol so richtig de Wy und's Fleisch, denn ues ziehts zrugg noch Bolivie.

Es isch au in Argentinie e super schoeni Ziit, fuer ues aber zu europaeisch gsi. Morn gohts mit em Bus vo Salta uf Santa Cruz de la Sierra, also zrugg noch Bolivie, wo mir au nomol en Trek woend mache. Sind doch in Argentinie ziemli fuul und traeg worde und das woend mir i de Sajama kompensiere.

Drum also morn adios Argentina oder wie wuers Madonna bzw. Evita Perron doch saege:

Don't cry for me Argentina
The truth is I never left you
All through my wild days, my mad existence
I've kept my promise, don't keep your distance