|
Welcome to Bolivien 16.07.2008
Nochdem ues de Juan und de Bernardo ganz intressiert bim Yazze-Spiele zueglueged haend, haemmer ihne s'Spiel wellae erklaere. Mir haend glii gmaerkt das es ganze aber nur vereifacht moeglich isch und so sind mir de Reihe no abe gange. 03.08.2008 D'Wiiterreis isch noch Potosi gange wo mir allerdings nur ei Nacht verbrocht haend, denn ueses Ziel isch d'Salar Uyuni, wo mir scho einiges drueber ghoert und au scho super schoeni Bilder gseh haend. Also wieder 7h Busfahrt und ab uf Tupiza. Ich (Chrigel) ha mich uf es schoes Doerfli gfreut, bi aber eimol meh entuescht worde, me doerf i dene Laender halt wuerkli nid z'viel erwarte. Tupiza haet ussert 4 Reiseagenture, 1 Mirrador und 5 Pizzerias nid viel wo eim es Herz hoecher schloh loht, allerdings haend mir kei Tour i die noecher Umgebig gmacht, wo sehr schoen sii soell. Nochdem mir alli 4 Agenture abklappered haend, isch fuer ues eigentlich fescht gstande, mit welere Agentur mir d'Salar woend mache. Wo mir allerdings uesen Trip haend wellae nagle, isch de Priis denn doch wieder anderscht gsi und es ganze isch wieder vo vorne los gange. Hola Chicooooooos, so haend mir wohl oder uebel also wieder zrugg zu de Jennifer Lopez vo Tupiza muese, wo ues mit ihrem Hola Chicoooooooos ziemli uf de Sender gange isch, trotzdem haend mir Tour bi ihre denn buecht. Do uesi French-Connection ueber d'Priise do in Tupiza sehr erstunt gsi isch und mit dem ganze Theater isch d'Stimmig ziemli im Cheller gsi. Mittlerwiile 21.30h haend mir en riise Hunger gha und sind eini vo dene Pizzerias go esse. Mit 2 riese Pizzas haend mir verdruckt, zum Glueck haets no 8 wiiteri Franzose im Resti gha wo wohl weniger Hunger gha haend als mir. Uf jede Fall haend mir noch ihrem Weggang ihri Reste denn au no verdruckt. Isch wohl au es erscht mol i uesem Lebe gsi, wo mir ineme Restaurant fremdi Teller leer gmacht haend. Sunntig-Morge am 09.00 h simmer alli zaeme im Tourbuero gsi. Hola Chicooooos, doch vo de Jeep isch no wiit und breit kei Spur gsi. De Chef (min Hermano) haet no muehsam muese Quittige usstelle, als het er das nid am Vortag choenne mache wo mir 2 mol vergebe ane sind, und haet so de Anne ihri Nerve meh als strapaziert -> Anne is not amused Teil 1 (damol nid d'Claudia). Am 10ni isch denn uesen Jeep do gstande und 30 min spoeter, noch em letschte Hola Chicoooooos, isch es denn endlich los gange. 4 Taeg und 1'300 km im Jeep, vorbii a gruene, blaue, rote Lagune mit und ohni Flamingos, Geisire, Berge i underschiedlichste Farbe und Forme.
D'Landschafte sind mega idruecklich und abwechsligsriich gsi und so sind d'Fahrte im Jeep mega churzwiilig und intressant gsi. De Hoehepunkt isch am 4 Tag d'Salar gsi. Am 6i isch es los gange zum de Sunneufgang i de Salar z'erlebe. Die Farbe zaeme mit de Salzwuesti, die Wiiti - eifach unglaublich und super schoen, mit unter oepis vom schoenste wo mir je gseh haend.
+- 20 km nochdem mir d'Salzwuesti, das Paradies, verloh haend sind mir uf Uyuni cho. Fuer ues wie en Schock. Dreckig, verstaubt und total abecho haet sich ues die Stadt am Rand vo de Salzwuesti praesentiert. Nochdem super schoene Naturschauspiel und de "cleane" Wuesti en extreme Kontrast. Nochere churze Stadtfuehrig isch es denn definitiv zrugg uf Tupiza gange und somit isch au d'Ziit in Bolivie bereits abgloffe. Mir haend entschiede wiiter noch Argentinie z'reise und ues uf d'Suechi noch de Cataratas de Iguazu im Nordoste vom Land ufzmache. Am noechste Tag sind mir also ueber d'Grenze noch Argentinie genauer uf Salta, wo mir erscht um Mitternacht ahcho sind. HASTA LUEGO BOLIVIA............?????!!!!!! 22.08.2008 Urspruenglich haend mir planed ueber Chile zrugg uf Bolvie z'goh. Wo mir aber gseh haend, dass me vo Salta (Argentinie) direkt uf Santa Cruz de la Sierra (Bolivie) mit em Bus cha fahre, haend mir uesi Plaen zum x-te mol gaendered. In Bolivie haet grad Wahlkampf gherrscht und es sind am Wucheend Wahle ahgstande. Es isch debii um d'Umverteilig vom Riichtum vom riiche Oste/Suede meh in Richtig La Paz/Ande und somit zu de indigene Bevoelkerig gange. Dass das im Oste/Suede natuerlich nid gfallt verstoht sich vo selbst und drum isch es in Bolvie zu dere Ziit ziemli hitzig her und zue gange. D'Bevoelkerig haet ihrem Unmuet Luft verschafft, in dem si churzerhand Zuefahrte uf La Paz und Bolivie blockiert haend. Wo mir also am Friitig, direkt noch uesere Ahkunft in Salta, haend wellae d'Billette uf Santa Cruz chauffe isch das nid moeglich gsi, will kein Bus uf Santa Cruz gfahre isch. So sind mir uf direktem Weg wieder i "ueses" Hotel, Zimmerbezug und ab is Internet go luege oeb das au wuerkli so schlimm isch und d'Strosse au wuerkli blockiert sind. Leider haet sich das Ganze bestaetigt. Ziemli konsterniert haend mir wieder ueber uesi urspruenglich Route Argentinie - Chile - Bolivie nohdenkt. Nei! Risiko, am Sunntig naemed mir de Bus und goend in Richtig Bolivie, wenn moeglich noch Santa Cruz. So sind mir denn also am Sunntig in Bus Richtig Bolivie igstige. Bis a d'Grenze isch au alles guet gange, ebe bis doet ane. Nix geht mehr. Do Wahltag gsi isch, was mir jo au gwuesst haend, haend d'Bolivianer d'Grenze zu ihrne Nochbarlaender zue gmacht. Me stell sich das mol bi ues i de Schwiiz vor, mit uesne vielne Wahle.... Bis am 20.00 Uhr isch's denn au nid wiiter gange, denn endlich haends Grenze doch no ufgmacht und mir haend choenne uf Bolivie iireise. D'Wiiterfahrt isch trotz em Wahlsieg vom Praesident Don Evo Morales, haet scho fascht Gottesstatus in Bolivie; zumindest bi de Indigenos, problemlos verloffe und mir sind am 03.00 Uhr (5 h spoeter als planed) in Santa Cruz ahcho. Santa Cruz isch so e ganz anders Bolivie, wie mir das bis anhin kennt haend. Fascht kei Indigeni-Bevoelkerig, viel meh Wiisi und meh Richtum. Do si mit de Abstimmig ueberhaupt nid iverstande gsi sind, haend d'Behoerde churzerhand gstreikt, was mir noch uesere 1.5 h suechi noch de Touri-Info und ufgrund vo de Zeltstadt vorem Regierigssitz schlussendlich denn festgstellt haend. Mir haend ein Tag eifach nuet gmacht, noch uesem 22.5 h Trip vo Salta uf Santa Cruz isch das au dringend noetig gsi, und sind am Folgetag go 2 Jesuite-Missione bsueche, wo voneme CH-Jesuit im 17 Jh gruendet worde sind.
Total sind mir au a dem Tag wieder 11 h im Bus gsesse, mir sind halt mittlerwiile wuerkli suechtig..... Wo mir a dem Morge am Bahnhof die vielne Bus-Moeglichkeite noch La Paz gseh haend, haend mir gfunde es isch nid noetig es Billette am Vortag z'chaufe. So sind mir am Mittwuch, 13.08.2008 am 16.00 Uhr uf de Bushof und haend am 17.00 Uhr wellae wiiterfahre uf La Paz, also ebe haend wellae. Nix Platz huet fuer uf La Paz haets ueberall gheisse. Ziemli gnervt ab uesere Bloedheit haend mir en neue Weg uf La Paz muese sueche. So haend mir denn am 20.00 Uhr en iheimische Bus uf Cochabamba gno (13.5 h) und vo Cochabamba uf La Paz (7 h). So es Chaos bim Istiege in Bus wie a dem Obig haend mir uf uesem ganze Trip no nie erlebt und haend das ganzi amuesiert mitverfolgt. Churz noch de Abfahrt isch den d'Busbegleitig no hindere cho und haet ues wuesse loh, dass mir im Fall vonere Kontrolle noch Sucre fahred und e Delegation sind. Ob ues da d'Polizei oder wer au immer abnimmt, mir 2 Touris ghoered zunere Delegation vo Sucre? Es haet denn kei Kontrolle geh und mir sind froh gsi wo mir denn doch in Cochabamba und nid in Sucre ahcho sind. Mir haend ues riisig uf La Paz gfreut, einzig bim Ueberquere vom Plaza de San Francisco haet de Chrigel wieder churz a d'Schreckenshalbstund muese denke, wo mir 3 Girls nid uftaucht sind. Uesen Plan isch en 3-4 Tagestrek i d'Sajama gsi und so haend mir am noechste Tag en Tourabueter gsuecht wo uesne Vorstellige, vor allem bezueglich Priis entspricht. Mir haend denn au eine gfunde und d'Lady haet no einigi Trekroutene wellae abklaere, wo mir ues denn fuer eini hetted soelle entscheide. Wo mir wie abgmacht am 16.00 Uhr wieder bi ihre im Office - nei nid es Oral-Office ;-), gstande sind haet sie nur gmeint, kein Fuehrer ume -> kei Tour, wenn denn muesed mir`s uf eigni Fuscht probiere. Soells wuerkli nid sii mit de Sajama und de ganz Weg zrugg vo Argentinie fuer d'Chatz? Haessig, will mir den ganz Tag fuer d'Suechi nocheme Tourabueter verpufft haend und jetzt doch aellei goh muend, sind mir zum Busbahnhof gloffe und haend det uesen Weg i d'Sajama organisiert. Zrugg im Hostel haend mir no ueses Paeckli i d'Schwiiz, under anderem mit 11 Hemder, 9 Kravatte und verschiedenem Krimskrams, grichtet. Die Hemder und Kravatte sind soooo guenstig gsi, do haet de Chrigel nid choenne wiederstoh und muese zue schloh. Ich ha nomol im Fuehrer nohglueged weg uesem Weg vo morn und muese feststelle, dass es am Samstig kein Personetransport i d'Sajama git. Da doerf nid wohr sii! Egal, soetis wuerkli nid moeglich sii am Samstig i d'Sajama z'cho, so uebernachtet mir im noechste Ort und goend halt erscht am Sunntig i d'Sajama. So haend mir uesen def. letschte Obig in La Paz denn doch no choenne gnuesse und au es Paeckli haend mir uf die wiit Heireis per Seefracht gschickt. D'Fahrt am Samstig i d'Sajama isch total problemlos ueber d'Buehni und am 15.00 Uhr sind mir endlich im Ort Sajama umgeh vo 3 Vulkaen ahcho. Zfriede haend mir es sehr eifachs Zimmer binere Familie bezoge und haend ues bim sajamische Parkheini ueber moeglichi Toure informiert. Eigentlich haets nur 3 Moeglichkeite geh, 1. wandere aber das segi nid so spektakulaer, 2. mit em Bike und 3. d'Bestiigig vom Sajama (6'542 m.ue.M). Mh, und das soell alles sii? So haend mir ues denn uf en Bikeusflug festgleit. Laeck sind das Stuehl gsi..... das die ueberhaupt no gfahre sind, es Wunder. So sind mir denn meh oder weniger schnell zum 12km entfernti See abgmueht. Ziemli entnervt ueber die Stuehl haend mir denn d'Natur und Tierwelt doch no chli choenne gnuesse, aber scho glii haet de Rueckweg gwarted. Oepe noch 7 km haets im Chrigel denn no de Wechsler i d'Speiche gno -> Chrigel is not amuesed Teil 2. No meh entnervt und nur mit Mueh sind mir wieder in Sajama ahcho und haend em Parkheini ziemli klar z'verstoh geh was mir vo ihm und sine Stuehl halted. Am spoetere Nomittag haend mir denn no e wanderig i die noecher Umgebig gmacht, was ues wieder beruhigt und au viel meh paessled haet.
Eigentlich haets nuet meh geh, was ues i de Sajama greizt haet und so haend mir beschlosse bereits noch 1.5 Taeg wiiter noch Chile, genauer Putre z'reise und d'Fortsetzig vo de Sajama eifach z'Chile und Namens Lauca under d'Lupe zneh. So isch jetzt also uesi Ziit in Bolivie definitiv z'End und mir sind froh haend mir d'Sajama schlussendlich doch no choenne mache, au wenn's ab und zue fascht zum Verzwiifle gsi isch. CIAO BOLIVIA, QUE VAYA BIEN!!!
|
