Welcome to Chile

22.08.2008
Chile la ultima destinacion!

D'Abreis i de Sajama haet ues denn doch au no chli beschaeftigt. Es haet naemli kei Collectivos, Bus oder sonstiges geh wo ues direkt uf Putre, uesem noechste Ziil brocht hetti. So haend mir denn am Morge 06.30 Uhr de Fahrer vom Collectivo uf Patacamayo doch no choenne uberzuege, dass er ues a d'Grenze uf Tambo Quemada bringt. So sind mir denn am 07.45 Uhr am bolivianische Grenzuebertritt gstande und haend uf d'Geldwechsler gwartet. Irgendwenn haend mir denn uesi Bolivianos i Chilenos gwechsled gha, aber jetzt wie wiiter uf Putre? Do ues kein vo de Lastwagefahrer haet wellae mitneh, kei ahnig worum - mir gsend doch soooo vertrauenswuerdig us, haend mir denn schlussendlich bineme Bus choenne ufspringe wo ues uf de Panamericana, i de noechi vo Putre, wieder abgsetzt haet.

So sind mir denn also a de Panamericana gstande und haend nid wellae mit em ganze Gepaeck di 4km lang Hauptstross noch Putre laufe. Fuessspure gsuecht und au gfunde, sind mir dene ines Flussdobel gfolgt, wo uf de andere Siite vom Fluss wiiter und direkt is Dorf gfuehrt haend. Ziemli kaputt und gfuehlsmaessig wie burros (Esel) haend mir es erscht beschti hostal gno.

Am noechste Tag haend mir uesi letscht Wanderig i de Ande under d'Fuess gno. Sie haet ues zu Wandmolereie vo de chilenische Andinos gfuehrt, wo de Weg vor Johrhunderte benutzt haend um vo de Ande a d'Kueste z'cho um det Handel z'betriibe.

Do's kei Charte geh haet und mir au kein Fuehrer haend wellae neh sind mir natuerlich nid uf Ahieb as Ziil cho und haend en meh oder weniger chline/grosse Umweg gmacht. De haet ues allerdings uf en Berg gfuehrt, wo mir e traumhafti Ussicht uebers Tal haend choenne gnuesse.

Huet sitzed mir bereits in la Serena. Sind am Mittwuch-Mittag, innere total 25 h Fahrt, do ane braust und gnuessed jetzt no chli es easy leaving.Uebrigens haend mir de ganz Weg vo Putre zrugg zu de Panamericana wieder muese under d'Fuess neh. Do de versprochni Bus am 11.30 Uhr aber nie cho isch, haend mir ues ueber es letschti Mitbringsel vo de Schwiiz hergmacht. Genau Beatrice, es sind dini Gummibretzel wo du ues am letschte Obig i de Schwiiz no geh haesch. Sie haend ues bis am Mittwuch treu begleitet.

So, das isch jetzt wohl uesen 2. letschte Homepageiitrag gsi. Inere Wuche sitzed mir bereits im Flueger zrugg i d'Schwiiz und somit zu eu. Miteme lachende und eme weinende Aug werdet mir Suedamerika zrugg loh, mir freued ues aber riisig eu endlich wieder i uesi Arme choenne z'neh!

HASTA LUEGO!!!!

Claudia&Chrigel

04.09.2008
Unsere letzten Tage in Südamerika.... und scho isch alles vorbi!

In La Serena haend mir das ganze denn e chli ruhiger ahgange und haend es "Stadtlebe" mol wieder chli gnosse. Leider haend mir bis zum Schluss kei Kafi gfunde wo ues de Kafi au wuerkli gschmoeckt haet und mir hetted doch dringend so eine brucht-> leider gits in Chile kei Chetti wie in Bolivie - Alexander Café que rico!!!!

Am Sunntig sind mir denn uf üsi letscht Tour -> Parque Nacional de Humboldt haet uesi Destination gheisse. Uf 2 Insle, noech bim Festland, cha me det d'Humboldt Pinguine, Seelöje, Vögel und mit Glück au no Delphine gseh. Und mir haend Glueck gha.

Es isch super schoen gsi die Delphine mol i de Freiheit choenne z'gseh und mir haend de Ahblick total gnosse. Leider haet me d'Pinguine nu vo wiitem gseh und inere recht chline Ahzahl und au suscht, isch noch Galapagos das halt scho nuemme so spannend gsi. Sind halt i dere Beziig scho sehr verwoehnt. Trotzdem isch es nomol schoen gsi e chli i d'Natur z'goh. So und denn sind mir scho uf em Weg zu uesere letschte Destination - Villa Alemana - gsi. Mir haend die letschte 4 Taeg vo uesem Trip bineme ehem. Nochbor vo's Oberholzers choenne verbringe. De Dani isch vor 3 Johr defintiv uf Chile zu sinere Frau usgwandered und haet sich in Villa Alemana es neus, schoes Dihei gschaffe.

Au in Villa Alemana haend mir nuemme viel gmacht und ues e chli vom Dani und sinere Familie verwoehne loh. Villa Alemana liit i de Noechi vo Viña del Mar und Valparaiso und so haend mir die Ort grad vo uesem Domizil us choenne go bsueche. Valparaiso isch bekannt fuer sini Liftseilbahne wo um d'Johrhundertwendi baue worde sind und huet no so sind wie zu dere Ziit. Viña del Mar isch en eigentliche Touri- und Badeort, wo vo de Argentinier im Summer schiinbar in Beschlag gno wird.

Uesi Vorfreud uf de Friitig isch aber au immer meh gstiige und so sind mir denn wuerkli miteme lachende und weinende Aug richtig Flughafe, miteme churze Abstecher uf Santiago, gfahre. Am 18:45 haet uesen Flug mit de LAN abghobe und mir haend es letscht mol en Blick uf Chile und somit uf de suedamerikanisch Kontinent gnosse. Nocheme churze Ufenthalt in Madrid isch es denn endlich, definitiv zrugg i d'Schwiiz gange, wo mir vo uesne Familie und Fruende mit Fahne, Glogge, Wy und natuerlich Appezeller empfange worde sind. Fuer ues isch das en sehr bewegende und emotionale Moment gsi, so noch 4.5 mt...... eu allne es herzlichs dankeschoen fuer euen super Empfang!

Denn haend sich alli vonenand verabschiedet, es seg nuet meh. Es paar goesed as Stadtfaescht in Schaffhuse, anderi muend go schaffe oder sind mued und goend hei. Mir haend das eigentlich nid wellae glaube, wo's denn aber uf Diessehofe gange isch und au i uesere Wohnig nuet los gsi isch haend mir ues uf en Obig dihei igstellt. Aha, doch verwuetscht. Mir sind denn zu de Miri&Dani, wo wieder alli uf ues gwarted haend. Isch en super schoene Obig gsi, genau so wie mir ues das vorgstellt haend. Nomol viele Dank fuer alles!!!!!!!

So da waer jetzt also uesen definitiv letschte Iitrag uf de Homepage gsi. Die 4.5 mt sind schlussendlich extrem schnell vorbii gsi. Dankbar ueber so viel schoeni Erlebnis, Erfahrige und vor allem das ganzi ohni Zwueschefall versueched mir jetzt wieder de Istiig in Alltag z'finde. D'Claudia wird ab em Oktober wieder mit schaffe ahfange und ich gang jetzt z'erscht mol no zum Samy Schmid und mach no min letschte WK.

Mir choennd allne en Trip uf Suedamerika sehr empfehle. Sigs weg de Kultur, de Luet, de Landschafte oder eifach zum mol wieder z'realisiere wie schoen mir's doch do i de Schwiiz haend und das alles aber gar nid richtig schaetzed. Fuer ues haet sich vieles relativiert - isch jo au ueses Ziil gsi - jetzt gilts das ganze so lang als moeglich choenne z'bhalte und villicht glingts ues jo sogar das ganze z'verinerliche.

Mir moechted ues au nomol fuer alli Mails, SMS etc. bi eu bedanke. Au wenn mir nid immer alli beantworted haend, so hand mir ues doch immer riisig ueber eui Nochrichte us de Schwiiz gfreut.

So da waers jetzt definitiv gsi mit Tricks und Gägs vo's C&C's - tschou zaeme!