Welcome to Ecuador

Sit am Dunnstig, 17. April 2008 isch ueses Dihei do in Quito. Mir haend mit ueserer Gastfamilie Arajo voll is schwarze troffe. Mir fuehled ues sehr wohl und willkomme.

Nochdem mir de Friitig vor allem mit schlofe und Chopfweh (Hoechi 2800) hinder ues brocht haend, sind mir am Samstig es erscht mol in Quito uf de Spure vo de Spanier gwandled. Am Sunntig haend mir ues mit em Busfahre vertraut gmacht und sind zum Midad del Mundo (en sehr touristische Ort) gfahre. Churz haend mir ues trennt und ich (Claudia) bi zrugg i di noerdlich Halbchugle, de Chrigel hani im Suede stoh loh.

Huet haets denn s'erscht mol gheisse "Hola numbres". Ich (Chrigel) ha mich mit Buechstabe und Zahle muese umeschloh, bis mir de Chopf qualmed haet. D'Claudia isch locker, miteme laechle naebed drah gsesse und haet mich korrigiert. Hasta luego!

01.05.2008
Hola chicos!
Juhuii!!! Ich has gschafft (Chrigel), s'Spanisch isch ueberstande ;-). Nochdem mir i dere Wuche sogar 2 mol am Nomi i d'Schuel sind, freued mir ues jetzt ufs verlaengerete Wucheend.

Mir goend morn uf Otavalo, det findet jewiils am Samstig de bekanntischt Maerkt vo Ecuador statt. Am Mentig started mir den endlich uesi Reis, wo ues z'erscht uf d'Galapagos fuehrt, aber jetzt z'erscht de Reihe no.....

Zur Erholig vo de Schuel simmer am Nomi meistens irgendwo i de Stadt gsi und haend versuecht grueni Plaetz z'finde mit e chli bessere Luft (haets in Quito immer mol wieder).

Am Dunnstig haet denn em Chrigel siis Herz hoecher gschlage, wo er no de Schluss vo Bayern imene Pub haet choene Luege (sorry a d'Schaffhuuser fuer die zum Teil komisch Schriibwiis, aber mir sind nid immer glicher Meinig).

Fuer uesi Fitness haend mir am Friitig gsorged und haends Hoehetraining vo de Lenzerheid wiiter gfuehrt. Mir sind 3 Stund uf de Hoechi vom Rothorn uf und ab spaziert. Under anderem haend mir die unendlich viele, waglige und steile Stufe vo de Basilica in Ahgriff gno. Als Belohnig haend mir us de Tuerm de wunderschoe Blick ueber die riisig Stadt gnosse, bis es zur Abwechslig wieder mol in Stroeme ahgfange haet regne.

De Pichincha isch de noegscht glegeni Vulkan vo Quito mitere Hoechi vo 4'900 m.u.M. Mir haends trotz em schlechte Wetter nid choene loh und haend die Hoechi woelle (wieder so e Wort) ereiche. Die erschte 1'200 Hoehemeter haend mir mitere moderne, aber langsame Seilbahn zrugg gleit. Noch dere Fahrt isch s'Laufe los gange. Sobald mir chli zuegiger gloffe sind, haet uesi Lunge nocheme Suurstoffzelt gschraue und mir haend en churze Stopp igleit, bevors denn imene gmaechlichere Tempo wiiter gange isch. Es besagte Suurstoffzelt hetted mir au uf em Retourweg no es paar mol choenne bruche :-)).
Am Kraterrand ahcho haet ues es Wetter zumene zuegige Rueckzug zwunge. Wenigstens simmer nid ganz aellei gsi; Nebel, Schnee und Rege haend ues bis zur Seilbahnstation treu zur Siite gstande (1.5h). Zrugg bi de Seilbahn, haet sich denn au d'Sunne wieder zeigt.
Gschlage gaebed mir ues aber nonid und bi de noechscht beschte Glegeheit griifed mir nomol ah!



Die viele Meinigsverschiedeheite bim Verbekonjugiere haend defuer gsorgt, dass mir i de Schuel trennti Weg gange sind. So haend mir i de 2. Wuche Einzelunterricht gnosse.
De Chrigel isch jede Tag gschlagner vo de Schuel hei gange, will ihn d'Lehreri mit Woerter, Adjektiv, Verbe und suschtige Usnahme ueberhueft haet :-(.

So viel Rege i chuerzischter Ziit, we ues do uf de Chopf plaetschered isch, haend mir glaub no nie erlebt und das am Endi vo de Regeziit. Mir hoffed sehr, dass es au da Johr so wie immer isch und Mitte Mai denn Trocheziit ahfangt.

Das waers mol wieder gsi mit Tricks und Gaegs us Quito, tschou zaeme!

 

13.05.2008
Pichincha II

Juhuii au z Quito sind die schwaere Regewolke verschwunde.

Bi Sunneschii und eme Sunnebrand hemer ues am Samstig z Quito aklimatisiert (vo 0 uf 3000 m.u.M) bevor mir am Sunntig no hoecher use hend woelle und de Pichincha in Agriff gno hend.

Noch chlinere Kletterpassage hend mir noch knapp 3 Stund de wuerklich Gipfel erreicht. Als Entschaedigung fuer de astrengend und "suurstoffarm" Ufstig, hemer am Abeweg de Usblick uf d'Natur und uf die riesig Stadt gnosse.

Am Mittwoch goht's jetzt  endli los mit Reise richtig Norde: Cotacachi, Ibarra, Cayambe, Latacunga, etc.

 

23.05.2008
Jetzt gohts richtig los....

Mittwuch-Morge, 14.05.2008 10:00. Jetzt heissts Abschied neh vo uesere Homestay-Familiy und vo Quito. Es isch allne sichtlich schwer gfalle, denn mir haend wuerkli e super Ziit in Quito doerfe erlebe, trotzdem started mir huet uesi Reis so "richtig". Uebrigens haend mir uesen Ufenthalt in Quito zwungener masse no um ein Tag verlaengered, will trotz Williams, Primperan, Imodium etc. ich (Chrigel) am Mo-Mittag mitere Mage-Darm-Verstimmig abglege bi. Dank Cola, Salzstaengeli (bayrischi) und Banane haets am Mittwuch denn aber klapped und mir sind zu de Laguna Cuicocha gfahre und haend am Kraterrand uebernachtet.

Am Morge frueh haend mir mol wieder d'Wanderschueh gschnuert und sind 4.5h um de wunderschoen, tuerkisblau Kratersee mit 2 Insle i de Mitti gwandered. Wo mir uf halbem Weg, es isch erscht 09:00 gsi, Stimme ghoert haend, isch ues es Herz denn churz i d'Hose gheit. Im Fuehrer heisst naemli, das verschiedentlich vo Ueberfaell brichtet worde isch. Die ganz Ufregig isch aber schnell wieder verfloge, wo mir am Gegehang Waldarbeiter gsichtet haend. Am 14:00 het ues denn de Fernando, uesen Fahrer wo ues i d'Laguna gfahre haet, wieder soelle cho go abhole. Fehlazeig! Zum Glueck haet ues de Hostelbsitzer denn zrugg uf Cotacachi gfahre. Wo mir de Fernando am Busbahnhof gmuetlich gseh haend en Jass chlopfe, sich ues grad klar gsi, worum er ues nid cho isch go hole.... So sind mir denn wiiter uf Ibarra.

D'Bestigig vom Cubilche (Vulkan) isch sprichwoertlich is Wasser gheit und so simmer scho am Samstig direkt wiiter uf Latacugna (2h suedlich Quito), i de Hoffnig i de Hauptstadt vo de Provinz Cotopaxi en gmuetliche Sunntig z'verbringe. Und wie de Sunntig gmuetlich gsi isch. Nix los in Latacugna, nid e mol es Kafi isch offe gsi. Schnell weg vo do, haemmer am Maentig-Morge wieder de Bus under s'Fuedle gno und sind a d'Laguna Quilotoa. Dass de Fahrplan meh theoretisch existiert haemmer det denn def. bestaetigt uebercho. So lang de Bus naemli nid voll isch, goht gar nuet. Und so sind denn us de erhoffte 45 min Warteziit 1.5h worde. Aber mir haend jo de Ziit und das ganzi glasse gno.

In Quilotoa, eneme 30 Seeledorf mit 3 Hostals ahcho, haend ues 7 Chind wellae es Zimmer vermiete. Je weniger mir Interessi zeiged haend, desto tuefer isch de Priis fuer d'Uebernachtig gheit -> haend ues gfuehlt wie a de Wall Street eifach z'Quilotoa. Mir haend ues schlussendlich denn fuers 3. Hostal, ohni Abfangjaeger, entschiede und en super Obig verbrocht. Natuerlich haend mir au a dem Tag no d'Wanderschueh muese schnuere und sind zum 400 m tuefer glegni Kratersee gloffe und ahschluessend wieder ueh kraxled und das ohni Muultierhilf! Zrugg im Hostal haend mir mituebercho, dass es Paar aus Hawaii (Beatrice und Robi -> vo dem Spirit of Aloha choend ihr nu traeume), am Di ebefalls planed haet uf Chugchilan z'wandere. Do mir weder Charte gha no de genau Weg gwuesst haend, haemmer ues churzerhand zaeme gschlosse und mit de Laura und em Ralph (61) en super schoene Tag erlebt. Vereint, meh oder weniger uf direktem Weg, haemmer denn 6.5h spoeter es Ziil erreicht. Eimol hetted mir alli am liebste wieder kehrt, wo ueber e chlini Schlucht nur en Baumstamm gfuhert haet, so dass mir alli uf em Hosebode und allne viere das Hindernis ueberwunde haend. Mir haend denn erscht am Obig im Hostel erfahre, dass es au no en andere Weg gha hetti......

Churz vor 15:00 haend mir ues denn vo ihne verabschiedet, do lut Fuehrer am 03:00 uesen Bus fahrt. Fallt eu oepis uf? Ues bis det ane nonid. Noch mehrmoligem Nohfroge binere Bananeverchaeuferi und ihrere immer entnervtere Antworte, haend mir es ganze ineme Hostel wellae klaere. Im Hostal isch au ues denn schnell klar gsi (oh Wunder), dass mir das Dorf huet nid werdet verloh. Abfahrt Mo-Fr 03:00 isch a de Wand gstande, also glich wie im Fuehrer, und do 03:00 au in Ecuador am Morge (also i de Nacht) und nid am Mittag isch, haend mir ues no es Zimmer gno. So simmer denn churz go schlofe und am 02:15 wieder ufgstande fuer de Bus uf Latacunga. Uebrigens de Bus isch Rappelvoll gsi, au um die Uhrziit! Zum Glueck haend mir choenne chli schlofe bzw. isch es dunkel gsi, denn em Rumple ah isch d'Stross alles anderi als guet usbaue gsi und mir hetted de Bus wohl fluchtartig verloh, hetted mir gseh wo er ueberall versuecht sich en Weg uf Latacunga z'bahne.

07:30 in Latacunga, schoes Wetter und de Cotopaxi rueft. Mir haend sim Ruefe nid choenne widerstoh und haend de noechscht Tourabueter ufgsuecht und ab 09:00, haet grad no fuer en Kafi glanged, e Tour zum hoechschte, aktive Vulkan vo de Welt em COTOPAXI bueched. Es isch en hammer Tag gsi und wo de Cotopaxi i sinere ganze Pracht vor ues gstande isch, haemmer au d'Muedigkeit schnell vergesse. Allerdings haets am Morge gar nid e so uesgseh, als wuer er ues huet sis Haupt zeige. De Ufstieg zum Refugio (Bergunderkunft und Basislager) 4'500 uf 4'800 m.ue.M haemmer bi Schnee und Wind hinder ues brocht. Luschtig isch gsi, dass uesen Fuehrer erscht 5 Min noch ues und ziemli kaputt am Refugio ahcho isch. Es haet denn im Refugio en Tee geh und nochher isch es (immer no im Nebel) wiiter zum Gletscher gange. Bim Gletscher ahcho haet uf eimol es Wetter kehrt und ebe, do isch er vor ues gsi i sinere ganze Pracht. E unvergesslichs Erlebnis und absolut nid selbstverstaendlich, wie ues de Fuehrer gseit haet. Mh, waer villicht scho no laessig gsi au de Gipfel z'erklimme, trotzdem haend mirs sii loh und die Luet im Refugio, wo i dere Nacht denn ufgstiege sind, haend also alles anderi als guet usgseh und sich zum Teil mit Dextro probiert ufzbaue. Mir haend drus gschlosse, dass wohl scho d'Vorbereitige zum Ufstieg alles anderi als easy sind.

Gescht isch denn am 06:00 wieder de Wecker abe. Markt in Saquisili isch uf em morgentliche Programm gstande. En sehr traditionelle Markt ohni viel Touris. Im Vergliich zu Otavalo, isch de Markt no sehr viel urtuemlicher und me chunnt es Lebe so richtig mitueber, e viel groessers Erlebnis als in Otavalo. Im Ahschluss haend mir uesi Zelt denn in Latacunga abbroche und sind uf Baņos gfahre. Es sehr touristischs Dorf am Fuess vom Tungurahua, em im Moment aktivschte Vulkan vo Ecuador. Mir sind gspannt was ues die noechschte Taeg do erwarted, huet stoht sicher mol relaxe inere Therme uf em Programm und villicht choemmer denn do mol wieder uf es Bike stiege....

Machets guet, liebi Gruess und bis bald mol wieder!

 

03.06.2008
La hora para dicer adios Ecuador

Nocheme Tag Pause und nuet tue ussert eme Bsuech i de Thermalquelle, haemmer am 2. Tag z'Baņos dringend wieder oepis muese mache. So haemmer mit em Ralph (d'Laura isch chrank gsi, die 2 sind ebe au zur gliiche Ziit in Baņos wie mir) d'Wanderschueh wieder gschnuerrt und sind richtig Tungurahua los zoge. A de Krete vome "Huegel" richtig Vulkan simmer deruf kraxled. D'Ussicht ufs Tal vo Baņos isch sehr schoen gsi. Gruesch vom Tungurahua haemmer immer wieder ghoert, aber zeiged haet er sich ues nume eimol ganz churz.

Am Sunntig haemmer endlich mol wieder en Drohtesel under de Arsch (also under ueses knackig Fuedle)klemmt. D'Calle des Cascadas isch uf em Programm gstande und so simmer vo Wasserfall zu Wasserfall gradled. Nebst de halsbrecherische Ueberfahrt ineme Chorb am Seil ahtriebe voneme Lastwagemotor, haemmer es Radle mega gnosse. Es isch en mega Tag gsi, doch zwuesched dure hetted mir gern uesi Stuehl gha. Am Obig haend mir ues denn defintiv vo de Laura und em Ralph verabschiedet. Fuer sie isch es zrugg uf Hawaii gange. Schoen haend mir sie doerfe kenne lerne und villicht wandled mir jo bald au uf de Spure vom Spirit of Aloha, denn aber uf em Richtige (gell Beatrice und Robi).

Vorbildlich haend mir am Tag druf es Busticket noch Riobamba scho am Terminal gloest und sind uf "Befehl" vo dere nette Lady in Bus igstiige. De Ticketboy haet denn aber nuet vo uesem Ticket wellae wuesse, es segi nid es richtig Ticket und mir muesed nomol zahle. Ziemli sauer haend mir denn nomol $ 4 berappt. Sit do loesed mir es Ticket nu no im Bus, also sofern moeglich.... Huet haemmers naemli wieder am Schalter gloest ;-).

Nochdem mir de Tungurahua nie gseh haend, haemmer ueses Glueck bim Chimborazo (de hoechscht Vulkan/Berg vo Ecuador) wellae versueche. D'Priese vonere Tour as Refugio haend ues denn aber schnell zum Rueckzug zwunge ($ 150 fuer 2 Taeg p/P), fuer ecuadorianischi Verhaeltnis doch e chli uebertriebe.

Z'Riobamba wie au z'Alausi isch ueberhaupt nuet los gsi. So haemmer voller Spannig am Mittwuch de Zug zu de Nariz del Diablo (Tuefelsnase) gno. Die bekannt und beruehmt Zugfahrt (die Einzig vo Ecuador) uf em Zugsdach soell bsunders steil und idruecklich sii. Uesi Fahrt isch leider wortwoertlich is Wasser gheit. Zum eine haets gschiffed in stroeme, so dass mir nid ufs Dach sind und fuer ues Schwiizer isch es nid wuerkli e so spektuakulaer gsi. Es einzig spannende sind Froge wie: sind echt no alli Schiene det bzw. hebets em Druck vom Zug no stand? Also ich (Chrigel) ha es groescht Spektakel vor de Zugfahrt doerfe erlebe. Wenn eim de Zug uf die 11i versproche wird und denn de Zug erscht am 13 fahrt, denn isch d'Claudia not really amused. Da haet de Bahnhofwaerter ziemli starch z'spuehre uebercho. A uesere Abfahrtsziit haet sich aber trotz allem Isatz vo de Claudia nuet g'aendered und so haend mir denn erscht am 15.00 choenne wiiter uf Cuenca (4 h).

Die folgende 2 Taeg haemmer denn z'Cuenca (3. groescht Stadt vo Ecuador) es Stadtlebe gnosse und natuerli uf em Chrigel sin Geburi ahgstosse. Leider mit 2 Duetsche, wo so ganz und gar nid noch uesem Gusto gsi sind. Mir haends denn a dem Obig au fascht nuemme los brocht. Do sie im gliiche Hotel we mir uebernachtet haend, haemmer uesen Tagesrhytmus denn ine e chli ahpasst und glueged, dass mir ihne so wenig wie moeglich begegned. Ueses Glueck in Cuenca isch gsi, dass es Corpus Christi-Fescht im Gang gsi isch und das haet gheisse e ganzi Stross mit Staend voller Suessigkeite. Em Chrigel sin Geburi isch grettet gsi. Z'Cuenca isch ues sehr schnell bewusst worde, wie sehr mir doch a de Natur hanged und eigentlich so wenig wie moeglich i de Staedt woend verbringe. So simmer denn au noch 2 Taeg scho wiiter zoge noch Vilcabamba.

Claudia is not amused Teil 2. De Ticketboy haet fuer d'Fahrt vo Cuenca noch Loja doch tatsaechlich $ 7.50 verlangt, obwohl im Fuehrer stoht, dass die Fahrt nu $ 6 chosted. Da haet sich Claudia natuerlich nid buete loh, und haet wild uf ihn igschnorred, bis er ues fuer $ 6 mitfahre loh haet. Uf de Fahrt isch denn en Ecuadorianer igstige. Im Underschied zu de Claudia haet er die $ 7 ahstandslos zahlt, de Ticketboy haet ues also nid wellae ueber's Ohr haue, aber trotzdem haet sich de Isatz jo glohnt, und denn erscht no uf spanisch.... :-)).

Die "unnoetige" Kalorie vom Corpus Christi haemmer do in Vilcabamba schnell wieder verlore. Taeglich isch ei Tour vo 3 - 7 h uf em Programm gstande. Es haet richtig gfaegt, sich i dene unendlich wiite und gruene Huegel us z'tobe. Vilcabamba isch es eigentlichs usstieger Dorf, wo sich sehr viel Europaer nieder gloh haend (au netti Duetschi). I dere Region lebed die aeltischte Luet vo Ecuador, worum die so alt werdet >100 Johr haend mir nid use gfunde. Mir haend det e super Hostel mit Sicht uf Vilcabamba gha. Richtig schoen zum sich am Obig vo de Wanderige z'erhole. I uesere Ziit haet i dem Hostel au e richtigi CH-Invasion statt gfunde. Nid weniger als 10 Gaescht sind vo de Schwiiz gsi. Mit 4ne vo dene reised mir huet Nacht wiiter noch Peru.

Es heisst jetzt also bereits adios Ecuador y bienvenido Peru. Mir haend e super Ziit do in Ecuador doerfe erlebe und bi wiitem nid alles gseh. Eigentlich wuered mir beidi gern no chli i dem Land bliibe, aber au die andere Laender bueted ihren Reiz. Drum simmer sicher nu churz chli sentimental. Ecuador als Reiseland choend mir nu empfehle, que rico!

Hasta pronto de Peru!