Galoa the spirit of Galapagos

Mentig morge 5.45 Uhr: Viel z frueh fuer zwei Arbetslosi, isch s Taxi vor de Tuer gstande und het ues zum Flughafe brocht. De Churztripp uf d Galapagos hemer chum choene erwarte, will mir de Rege do z Quito nuem usghalte hend.

Z Baltra acho, het ues de ( Segñor) Vuchelli, im gliche alter wie de Lonsome George und au so e Inselberuehmtheit, wie sich spoeter use gstellt het, abgholt und uf d`Merak brocht.

D`Merak, e Einmastmotorsegelboot, ueses Domizil fuer di noegschte fuef  Taeg haet ues treu uf d Insle Baltra, Santa Fe, Española, Floreana und Santa Cruz gfuehrt. Uesi Gruppe het sich us zwei Belgier, eme Neuzeelaender- und Holaenderpaar und vier Bsatzigsmitglieder zaeme gstellt.

Speziell a de Galapagos isch, dass jedi Insle ihri speziell Tierwelt het. Was mir allerdings uf jedere Insle ahtroffe haend sind  fuuli, frechi Seeleue und Krebs mit genjal luechtende Farbe uf dae schwarze Lavastei. Nebst dene zwei Tierarte hend ues verschiedeni Finke, Meer- und Landiguana ( wesentlich groesser), Eidechsli, Meer- und Landschildkrote,Albatros, Blaufuesstoelpel und en Hufe anderi verschiedeni Voegel uf ihrer Insle begruesst.En Fink isch sogar so frech gsi, dass er uf em Chrigel sim Chopf glueget het, wie's hoelelet.

Uesi sportlich Betaetigung isch naebscht Kauaparat betaetige en ein- bis zweistuendige Landspaziergang  und underschiedlichi Schnorchelgaeng i schoenem tuerkisblauem Wasser gsi, wo mir die farbefroh Unterwasserwelt, mit verschiedene Fisch, Haie, Roche, Schildkrotte hend doerfe erlebe. I ha sogar eimol en springende Derphin gseh, doch spoeter het sich uese gstellt, dass es en fluegende Vogel mue gsi si.

Am Friitig-Morge haend mir denn no en churze abstecher i Darwin-Station gmacht, wo Schildchrote vo de verschiedene Insle ufzoge und noch 5 Johr wieder usgsetzt werdet. Det haend mir denn au de 70 joerig Lonsome Goerge gseh. Es isch die letscht Schildchrote, wo me vor ca. 30 Johr uf de Insel Pinta gfunde haet. Bis jetzt sind leider alli versuech gschiitered de Georgi mitere ihm am noechschte verwandte Schildchrote-Lady z'paare und so wird er vorussichtlich die Letscht vo sinere Art bliibe.

Z'Esse hets immer in Huelle und Fuelle gha noed wie's ues prophezeit worde isch. Wenn mir's mol noed hend moege (wie meistens), sind die zwei Belgier dankbari Abnehmer gsi (uebrigens uesi noegschte Ferie fuehred ues definitv noed noch Belgie :-) , will doet gist entweder z'wenig oder nuet guets z'Esse).

Mit uesere unkomplizierte und coole Gruppe, hend mir fuef unvergesslichi Taeg dorfre erlebe.

PRIMPERAN: Laesst jeden Seegang zu einem harmlosen Landspayiergang werden (danke Daniela, din Tipp isch Goldwert gsi!).

I denae fuef Taeg hend mir uesi  Zuekunftsplaen chli konkretisiert; Seemaa/-frau da waer's (Noch dems ues am Fritig uf em Schiff woehler gsi isch wie an Land -> an Land hets naemli unheimlich gschwanket. Mitlerwile sind die Plaen aber wieder gstorbe.

So da waers gsi vo de Galapagos und i verabschiede mich mit mim treue Begleiter vo de Galapagos em Wiesfuesstoelpel Chrigel

p.S. Fuer all die wo mit de Begruessig nuet choend afange, dem cha vielicht oeper wo schomol z Hawaii gsi isch witer helfe. Erscht denn choen ihr eu oepe vorstelle wies usgoht.