15.06.2008
Hola Peru

Mit e chli wenig Schlof, uebermuedet simmer z'Piura acho und sind direkt wiiter uf Chiclayo. Bim Grenzuebertritt vom 03.00 - 04.00 simmer vo fluegende Kakerlake begleitet worde. D'Dateerfassig vo de peruanische Grenzpolizei isch sehr fortschrittlich, uesi Naeme inkl. Alter und Bruef sind jetzt vo Hand ineme Buech verewigt. Fuer de letschti Passagier haets leider nuemme glanged, do de Bus scho gloffe isch....

Z'Chiclayo, gnauer z'Tucúme, simmer Pyramide vo de Chimú-Dynastie (Vorgaenger vo de Inkas 1000-1375 n.chr.) und es Museum mit luter Usgrabige vom Señor de Sipan (vor 1700 Johr / Moche-Kultur) go ahluege.

Noch Moche- und Chimú-Kultur haemmer no chli meh ueber d'Inkas wellae erfahre und sind uf Cajamarca. Det haet de erscht Showdown vo de Inkas und de Spanier stattgfunde. De Atahualpa (de letscht Inka-Koenig) isch i dem Ort vo de Spanier festgno und spoeter, entgege de Abmachig und em hohe Loesegeld, uf em Marktplatz oeffentlich exekutiert worde. Nebst de "Zelle" vom Atahualpa haemmer es Thermalbad "Baños del Inca" mit 78C, Cumbe Mayo en Wasserkanal miteme Gfaell zum Teil i de Promillegrenze und Ventillas de Otusco alti Grabstaette bsuecht.

Zum Chrigel sim Glueck sind d'Suedamerikaner mega Fuessballfanatiker. So haemmer es Eroeffnigsspiel vo de EM choenne Live luege.

Urspruenglich haemmer mol no uf Chachapoyas wellae, wo tuef im Landesinnere liit und anderi Inka-Ruine beherbergt. Doch die ueberissne Priese ($ 500 p/P fuer 3 Taeg) und je 12 h Hi- und Rueckfahrt haend ues schnell devo abbrocht. So simmer noch 3 Taeg wiiter zoge, damol wieder am Tag. Do de Bus erscht am 10.30 gfahre isch, haend mir am Morge no Ziit gha zum de Claudia ihres Buchtaeschli z'sueche, aber au es Telefon uf Chiclayo is Hotel haet kein Erfolg brocht -> Minus 1 Buchtaeschli (ohni Inhalt) und es Paar Nerve haend au muese herehebe.

Vo Huanchaco (es chliises Fischerdoerfli bi Trujilo) haemmer wiiteri Ruine vo de Chimú bsuecht, sehr imposant und sehenswert. Nebst de spezielle Fischerboetli haemmer die peruanisch Surftechnik studiert. Zumindest gedanklich haemmer uesi Big Wave gfunde und sind dur de Kanal duregschosse. Leider haet d'Sunne gfehlt und so haemmer zwungener Masse de praktisch Teil i d'Duschi verleiht.

HOPP SCHWIIZ Teil 2!!! Fuer ues haet Trujilo nuet z'buete gha. So haets nocheme feine z'Mittag zum Dessert no Schwiiz-Tuerkei geh. Bekanntlich isch de Dessert i de Auge vom Chrigel meh en frische Fruchtsalat wie en Coupe Daenemark gsi.

Do d'Minearbeiter d'Panamericana gsperrt haend, haemmer bis am 18.00 nid wuerklich gwuesst oeb mir vo Trujilo weg choemed. Schinbar sind's aber schnell uf d'Forderige igange, denn zu uesere Erliechterig isch's am 21.00 los gange; denn nomol en Tag in Trujilo -> gaehn!

BIENVENIDO LA SUIZA DE PERU!
Vo de Underkunft haemmer es mega Andepanorama choenne gnuesse. Voller Motivation en 4-5 taegige Trek aellei z'mache simmer los und haend ues ueber Mietpriese, Route und Verpflegigsmoeglichkeite informiert. I de Casa de Guia haemmer no die letschte Details wellae klaere. E Schwiizeri vonere Tourismusfachschuel (Samedan), wo det es Praktikum macht, haet uesen Traum wie e Seifeblose z'erplatze loh. Sitere Wuche goht ageblich nuet meh uf em Trek ohni Guide. Ues haets ziemli abgloescht und uesi Stimmig isch churz uf de Nullpunkt gheit. Noch langem hin und her haemmer ues entschiede das Spiel nid mit z'mache. Als Entschaedigung haemmer 2 geniali Tagestoure zu de Lagunas Churup und 69 gmacht. Do's mich (Chrigel) i de Nacht vor Churup mol wieder kehrt haet, isch die Tour fuer mich denn ziemlich happig worde und waer d'Claudia nid debii gsi, denn het ich dene 600 Hoehemeter uf 3.5 km (uf 4450 m.ue.M) und de Laguna schnell de Rugge zue dreit. Uf em Retourweg haet min Koerper denn aber scho wieder noch Spaghetti gschraue und bereits am Folgetag isch alles wieder i.O. gsi.
De Weg zum Start zu de Laguna 69 isch nur mittels Taxi oder Colectivo (Buessli) z'bewerkstellige, ohni Garantie fuer en Ruecktransport. So haend mir ues denn am ahfang ziemli under Druck gsetzt zum moeglichscht schnell die 700 Hoehemeter uf 4500 m.ue.M zrugg zlegge um frueh gnueg wieder a de Stross fuer en Ruecktransport z'sii. Wo mir denn aber scho bald die erschte Gruppene hinder ues loh haend, haemmer es Tempo reduziert und haend denn doch au no oepis vo de Landschaft mituebercho... ;-)). Es Tal mit Wasserfaell und d'Laguna mit Gletscher sind traumhaft schoen gsi.

Leider wuessed mir bis huet nonid, oeb mir de Trek doch hetted choenne aellei mache, will noch wie vor jede oepis anders verzellt. Es Zelte mue jetzt halt no chli warte.So, jetzt warted 16 h Busfahrt uf ues, denn mir woend vo Huaraz direkt uf Nazca. Also mitere Stund Ufenthalt in Lima.

Ganz liebi Gruess us de peruanische Schwiiz!!! Take care!

Claudia & Chrigel

03.07.2008
Nazca - Lago Titicaca / Bienvenida la parte touristica de Peru

Uesi 16 stuendig Busfahrt isch dank Cruz del Sur (bi Touris sehr beliebti und im Verhaeltnis tuereri Busgsellschaft) easy a ues vorbi gange. Mittlerwiile als "Schnaeppchenjaeger" underwegs, haemmer au z'Nazca, wie faeng ueblich, noch em Beschte Priis-Leistig-Hostal gsuecht. Nochdem mir de Rest vom Nomi mit Flugagebot checke verbrocht haend (1. Rundi: Priisverglich; 2. Rundi: Priisverglich $ / Soles; 3. Rundi: Kommission mit Kreditcharte) haemmer nochere chlinere Meinigsverschiedeheit entschiede de Flug am noechste Morge direkt am Flughafe z'bueche.

De Flug haemmer denn am noechste Morge zuegig buecht und noch guet 2 h isch's denn fuer 30 Min i d'Luft gange. Zum Glueck haend mir de Flug nuechtern ahtrete! D'Flug- und d'Kurvetechnik ueber d'Nazca-Lines (Figure) vom Pilot sind sicher meisterhaft gsi, trotzdem isch's ues ziemlich uebel worde. De Chrigel isch die 2. Haelfti meh vo Schweissusbruech verfolgt worde, wie das er de Flug haet choenne gnuesse. Zrugg uf em Bode isch er pfloetsch Nass und chride Wiis gsi.

Am Nomi haemmer bereut das mir d'Wiiterreis erscht uf de Folgeobig buecht haend. Worum das s'Schicksal so haet wellae isch ues i de Nacht denn klar worde. Fuer eimol isch's nid de Chrigel gsi -> d'Claudia haet die halb Nacht uf em WC verbrocht!

Cusco haend mir dank em musikalische Schuelfescht mit Tanzilage und de verschiedene Cafis mit Terrasse grad is Herz gschlosse. Churz entschlosse und noch einige Kalkulationslaeuf haemmer de 5-taegig Salkantay-Trek zum Machu Picchu buecht. 04.30 isch's los gange. Zaeme mit je 4 Amis und Israelis, 2 Brasilianer, 1 Englaender und em Staff-Team haemmer die beschwerschliche erschte 1 1/2 Taeg Mollepata (2'850) - Salkantaypass (4'600) under uesi mittlerwiile unusstehlich stinkende Wanderschueh gno. Uf 3'800 m.ue.M haemmer ueses 1. Lager ufgschlage. Bi -5 Grad sind uesi Schlofsaeck voll i ihrem Element gsi (Beatrice&Michi; mir hoffed d'Schlofsaeck haltet de Gschtank us und ergriifed nid d'Flucht....).

D'Hoechi vo de Ande naemed d'Luet zum Teil uf die liecht Schultere, drum treit de Guide uf dene Toure jewiils e Suurstoffflaesche mit (wuessed nid wie lang die wuerklich wuer hebe, sie isch so chlii). Da haet sich au i uesere Gruppe zeigt, wo ein Israeli es liechts Lungeoedem (ohni Folge) gha haet. Noch em Salkantaypass (vorbii a Gletscher) isch es gmaechlich bergab gange bis mir am 4. Tag ziemlich erschoepft in Aguas Calientes ahcho sind. Vo Aguas Calientes (es reins Touri-Ort, wo ohni Machu Picchu chum wuer existiere) simmer nochere churze und entleerende Nacht (damol wieder de Chrigel) am 5i richtig Machu Picchu los marschiert. De Machu Picchu als Ganzes isch einzigartig und unbeschriiblich. Ueber de ganz Tag verteilt, haend mir vo underschiedliche Ussichtspuenkt die verschiedene Blickwinkel gnosse.

Claudia is not amused Teil 3: im Hotel zrugg haet de Nachtportier kein Versuech usloh zum d'Claudia uf d'Palme z'triebe, so dass sie entnervt d'Reception verloh haet. Under Maenner ;-) haemmer die ganz Sach denn chli ruhiger gno und schlussendlich simmer zu uesem Zimmer cho. Bi andere Tourteilnehmer haet d'Reservation nid so klapped wie bi ues und schlussendlich am 01.30 uf de Tourismuspolizei e Fortsetzig gno. Wie's usgange isch wuessed mir leider nid.

Fazit vom Trek: zahl in Peru nie was verlanged (Priise vo de Gruppe haend variiert vo $ 140 - 400) und selbst waehrend em Trek versueched sie d'Touris immer mol wieder ueber's Ohr z'haue. So hetted mir fuer e Hi- und Rueckfahrt 10 Soles soelle zahle, wo normal 4 Soles choscht. Haend das denn au nid akzeptiert und nochere laengere Diskussion isch's mit 4 Soles gange. Selbst i de Resti's vo Aguas Calientes sind Priise uf de Charte schnell makulatur, wennt nid grad begeisterig zeigsch und sie tauched bis 40 % vom urspruengliche Priis.

Waehred uesi Woesch am noechschte Tag am waesche gsi isch sind mir D - TR go luege, also de er vo ues. Sie vo ues haet uf de Terrasse d'Sunne gnosse. D'Woesch haend mir am Obig denn wieder abgholt. Mh, haet die guet gschmoeckt, also vor allem d'Socke.... Kontrolliert haend mir's aber erscht am noechschte Morge. Nix Unterhose vom Herr Meier. So isch es zrugg zur Laundry gange. Aha, noch em z'Morge sind 3 CK's scho wieder do gsi, nu no die 3 Prix-Garantie Slips (sexy Teils) haend gfehlt. Noch ere Diskussion haend mir mit de Wort: bis huet Nomi am 4 sind au die wieder do, haend mir s'Gschaeft richtig Salzterrasse verloh.

S'Valle de Sagrado isch super schoen gsi und au die Salzterrasse, wo scho sit +- 1'500 Johr Salz gunne wird, haend ues total guet gfalle. Prix Garantie Teil 2: noch mehrere Ahlaeuf isch uesi Señora denn doch no uftaucht, natuerlich ohni sexy Underhose. Wohrschindli haet de Ma vo ihre die scho ahgha und haet neckisch uf em Bett uf sini also uesi Señora gwarted. D'Underhose sind ues eigentlich scho lang gliich gsi, aber d'Ahschuldigung das Touris d'Woesch bringed und nochher behauptet es fehli d'helfti, obwohl i dere Woescherei natuerlich nie oepis vorlohre goht, haet ues gnervt. Es Beschti spanisch vom Chrigel haet dezue gfuehrt, dass sie ues nid mol meh i d'Auge haet choenne luege. Z'friede haend mir de Ort vom Gscheh verloh, sind zum Busbahnhof und ahschluessend bi -5 Grad (ohni uesi Schlofsaeck und ohni sexy Underhose) i de Nacht uf Arequipa gfahre.

En Trek aellei im Colca Cañon isch ueses Ziel gsi. Verunsichered vo so viel widerspruechliche Ussage bezueglich vermisste und verunfallte Persone haend mir ues denn trotzdem entschlosse es ganze uf eigni Fust und ohni Fuehrer in Agriff z'neh. Noch 1 1/2 h is uesi 6 stuendig Busfahrt abrupt underbroche worde -> Andalucia nix geht mehr. So haend mir denn wiiteri 1 1/2 h uf en Ersatzbus gwarted, wo ues schlussendlich denn sicher uf Cabanaconde brocht haet. Die kommende 3 Taeg simmer nur berguf oder bergab gloffe und haend ues zwuesched 3'300 und 2'000 m.ue.M bewegt. Uf uesem Weg haemmer verschiedeni Doerfli ohni Strom und Verbindig zu de Ussewelt passiert. Als Highlight, nebst de Uebernachtige i sehr herzliche Familie, haemmer am 2. Obig usne Bei e wohlverdienti entspannig i Thermalpools grad am Fluss goennt. Am 3. Tag, noch 1'300 Hoehemeter und voellig KO simmer wieder z'Cabanaconde ahcho. Neue Rekord, bereits am siebni haend uesi Laede gschlosse und mir haend d'Schlofsaeck zuezoge. Uf em Retourweg noch Arequipa haemmer denn no churz am Cruz del Condor halt gmacht und Flugshow vo de Condore gnosse. Unglaublich die Rueh vo dene Tier im Flug.

Ueses Zelt haend mir denn nur no fuer ei Nacht in Arequipa ufgschlage und sind gescht denn wiiter uf Puno an Lago Titicaca zoge. Do mir fuer eimol wieder e basic Busgsellschaft gwaehlt haend, isch d'Fahrt dur die verschiedene Essensverchaeufer immer mol wieder ufglockered worde. Puno haet ussert de verschiedene Insle nid viel z'buete. Mir haend huet en Usflug uf Uros gmacht; chlini schwuemmendi Insle wo alles us Schilf bestoht; die ganz Insle, d'Hueser, d'Boot (was sehr interessant und beidruckend isch) und d'Souvenirs wo d'Bewohner versueched a d'Touris z'bringe. Leider isch das ganze viel touristischer gsi als mir gmeint haend. Obwohl mir wieder aellei loszoge sind, haets uf dene Insle nu so vo Touris gwimmled und so sind mir bald wieder zrugg uf Puno.

Bereits haet die 2. Haelfti vo uesem Trip ahgfange und mir verloend morn Peru in Richtig Bolivie. Mir sind wiederum sehr gspannt und hoffed, dass mir gnueg Chaefer z'Peru gha haend und drum z'Bolivie verschohnt bliibed (d'Erfahrige vo de andere Touris zeiged leider es Gegeteil). Mir sind aber wiiterhin optimistisch. 

A dere Stell mol viele Dank allne fuer d'Gaestebuechitraeg und Mails. Au wenn mir nid immer grad alli sofort beantworted, so freued mir ues doch immer riesig ueber Nochrichte us de Schwiiz!